Locales pùblicos e cuntzessiones

Sa trata de sas cuntzessiones in donu sighit, ma non pro sos assòtzios e pro sos grupos chi dae semper òperant in su territòriu comunale. A retzire sos piagheres de sa giunta comunale, custa borta, est sa cooperativa Onlus OpportunEuropa, cun sede in Macumere. S'ente at otènnidu sa cuntzessione de “Casa Scarpa” a tìtulu gratùitu e at a isvilupare sas atividades suas dae su mese de frearzu a su mese de trìulas de su 2018.
In sos meses colados est tocadu a sa sotziedade privada Domus de Janas de Fabio Pillonca s.a.s. chi at retzidu, de badas e pro duos annos, sa gestione de sa “Casa Museo”. In custa diretzione nos semus zai mòvidos cun un'interrogatzione consiliare chi devet retzire ancora risposta.
LiberaMente Silanus non cheret pònnere in discussione sos bonos propòsitos de custas initziativas chi intervenint in su campu de sas polìticas giovaniles, ma sa manera de comente est istruturada sa cuntzessione pro su chi pertocat sa gestione de sos edifìtzios pùblicos. Non ritenimos curretu chi sos assòtzios, sas cooperativas e sos entes privados chi benint dae foras impreent sos locales comunales sena pagare nudda. La cunsideramos una manera de fàghere chi mancat de rispetu a sos assòtzios silanesos, custrintos a si pagare s'afitu de una sede privada.
Sos grupos culturales chi òperant in bidda cuntribuint a mantènnere bia sa camunidade, creande momentos de agregatzione e de ispàssiu. Pro custu motivu pensamus chi siat arrivadu su momentu de lis pònnere a disponimentu unu locale pùblicu chi los collat a pare.

Aggiungi ai preferiti : Permalink.

I commenti sono chiusi