• Nella sezione "BLOG" sono ospitati articoli pubblicati a titolo personale, pertanto non necessariamente rispecchiano la linea politica del gruppo

    "LiberaMente Silanus"

Deo voto “No”

berbeghesIn sos annos colados apo lotadu meda contra s'abolitzione de sa provintzias, contra su detzentramentu fartzu de su podere, chi ateru non est si non s'ispostamentu de su tzentru decisionale verso sa regione. Una regione chi cun sa leze eletorale crefida dae su partidu de Berlusconi e avallada dae su partidu democraticu at esclusu sas minorantzias in favore de unu parlamentu regionale formadu dae una élite de printzipales, sessanta omines in totu, paghissimas feminas, chi de fatu sunt sos meres assolutos de sa Sardigna e de sas risorsas nostras.

Una giunta de academicos chi si sunt chirrados tra issos e chi tra issos s'ant zogadu – comente in su giugu de su sedatu – sos assessorados. Una giunta e unu parlamentu regionale chi cheret intzegare sa zente cun peraulas comente "sovranismu" e "indipendentzia", ma chi ateru non est pratigande si non su peus clientelismu autonomisticu e su peus trasformismu italianu.

Ma posca, cantos sardos si sunt sapidos de cantu nos costat su tzentralismu in Casteddu? Casteddu non est tzentrale pro sos sardos, Casteddu est comodu petzi pro sos chi andant e torrant dae Roma, Casteddu est a un oru, est in unu cuzone, cantu costat a sos sardos a andare e torrare dae Casteddu. In cuss'oru, bene arrocadas, paritzas pessones, meda de sas cales non ischint mancu ite b'at a susu de Seddori, detzidint pro totus sos sardos. Casteddu non est sa capitale de sos sardos, Casteddu est s'iscalu pro sos ministros, sos prefetos e sos cummissarios italianos chi a inie benint a nos dare sos ordines, comente cussu piciocheddu chi como est comandande su partidu democraticu (l'iscrio in minore ca cussu pro me non est unu partidu e non tenet mancu nudda de democraticu).

Como semus meses blocados cun custa cuntierra subra sos referendum, unu referendum chi cun s'iscusa de sa semplificatzione cheret sighire in s 'opera de fascistizare s'Italia e sas terras anzenas comente sa nostra, paga zente chi comandat e a fora sas minorantzias. Custu referendum est un ingannu comente pagos, incomintzande dae su cuesitu.

Mancari deo non sia unu politicande de professione apo semper ischidu chi non si podet votare cun unu "SI" o "NO" poninde a pare chistiones meda diferentes tra issas, nos cherent fagher votare cun unu "Emmo" o "Nono", cun unu "lea o lassa" totus sas normas chi custu guvernu at detzisu poninde a banda sas prerogativas de su parlamentu.

Non petzi. Custu guvernu at giai detzisu de abolire su Senadu elezidu, cun unu atzoroddu cumpostu dae sos rapresentantes de sas regiones e nois giai ischimos comente funtzionant custos sistemas magioritarios. Si passat custu sistema-trufa, basadu totu subra su magioritariu, basadu subra cussa minorantzia chi at andare semper prus a pagu a votare, sas minorantzias anta a contare semper de mancus.

Semus sighinde in s'ormina de su chi aiat fatu su governu D'Alema poninde manu in sa Costitutzione e su guvernu de Berlusconi cun sa leze eletorale e dae tando donzi guvernu s'intendet legitimadu de faghere ater'e tantu, cando in realtade non sunt sos guvernos chi podent ponner manu in lezes gasi diligas pro sa democratzia, pro custas cosas amo elizidu sas duas cameras de su Parlamentu. Pro sa costituzione est galu prus importante chi siat zente de grande cumpetentzia e possilmente sena interessos partiticos e eletorales a valutare cun grande atentzione donzi minimu mudamentu de sa leze fundamentale de s'Istadu, non est debbadas chi pro iscriere sa Costitutzione b'est crefida sa Costituente.

Inoghe inveces, zente votada pro esighire e faghere rispetare sas lezes s'at leadu s'apentu de mudare su chi non podiat mudare e de dare in pastu a sa zente unu cuesitu chi in pagos sunt in gradu de cumprendere, deo a innantis.

Fintzas custa borta, comente in totus sas votaziones "italianas" s'importu de sos sardos est proportzionale a su numeru de sos abitantes e non lompet mancu a su tres pro chentu, in pratiga, totus paris, contamos prus pagu de unu bighinadu de Roma o de Napoli, duncas sa gana de andare a votare diat esser paga, mescamente pro unu comente a mie chi non s'intendet prus italianu in nudda, si non pro s'anagrafe o pro sa limba chi a dolu mannu nos ant impostu.

Si ando a votare apo a votare duncas chi "NO", unu nono contr'a sa ditatura de sa magiorantzia, unu nono contr'a su tzentralismu, unu nono contr'a sa limitatzione de sa rapresentantzia democratica.

Anghelu Morittu


Custa est s'opinione personale mia, non est e non cheret essere sa linia politica de LiberaMente Silanus.

Aggiungi ai preferiti : Permalink.

Commenti chiusi